دمعــــــــــــــــــــــه

ليش بحس حالي احيانن مشتاقه لدموع الفرح
اكيد مش من كتر دموع الحزن - لا سمح الله- بس من زمان ما بكيت ع شي فرحني

في دمعه الواحد بحبها,, وبس تخلص بتمنى إنها ترجع
بتكون حاسس حالك تمسحت,, خلص ,, بطل فيك بعض المشاعر
مش عن مشاعر الحب والغرام عم بحكي
مشاعر اخوه,, صداقه مش عارفه ايش اسمها
وفجاءه,, بتلاقي انه لساتك بني ادم,, وفيك تحس متل باقي البشر

زمااااااااااااااااااااااااااااااااااااااااااااااااااااااااااان ما قعدت مع حدن وتعاتبت وصرخت وبكيت,,
وزماااااااااااااااااااااااااااااااااااااااااااااااااااااااااان ما شفت حدن مسؤول عني اجى وسمعني كم كلمه ف العضل - لمصلحتي- خاصه من عيلتي الكريمه
تحديدن من اخوتي - اللي كانو- يعني ئد ما كبر الواحد,, وئد مافكر حاله انه صار فهمان,, بيضل صغير وطفل وبحاجه للتوبيخ والتأنيب من مره للتانيه
وبحاجه إنه يغلط مع حدن يمون عليه,, ويستنى عقابه او معاتبته عشان يزيد من معرفت حاله او من معزه الشخص اللي قباله
ولمى تنزل هديك الدمعـــــــــــــــــــــــــــه
اه صعبه,, وبتجرح,, وبتوجع القلب
بس بنفس الوقت حلوه وبشتائلها,, لإنها شي جديد فقدته ورجعلي