أب يحرق أبناءه الخمسه في الرمثا

الموضوع للوهله الأولى عباره عن شناعه بحت،،،،

إشي حقير جدن إنه تشوف أب،، عم بحاول يتخلص من أبناءه بطريقه وسخه زي هيك،، حــــرق

يعني مش : طخهم وريحهم من إكمال حياتهم بجسد محروق ومشوه ،، او إختناق و ظيق نفس على طول حياتهم

أو جاب سكينه وهجم عليهم بعد ما أعطاهم منوم وريحهم وريّح راسه

هاد هوه الحل الوحيد اللي لقاه،،

 يحشرهم في غرفه ملهاش منفس ويولع الدار ويضله فيها عبيل ما الله ياخد وداعته ويخلصهم من عذابهم  مره وحده...

الناس الي ما فهمت شو حالة الرجل النفسيه

اطلقت عليه أحكام صبعه تنفهم ،، كافر،، زديق،، ملحد،، مجنون،، مريض نفسي،، 

أنا مش رح ادافع عنه،، وأكييييييييييييييييد إزا الله راد مارح اعمل زيه

بس للأسف إنحطيت في مكانه 

"In His Shoes "

لقتره لا تزيد عن ال ساعه وشوي ,, وإنجنيت

من إسبوع تقريبن كانو دار إحماي وأبو عمر طالعين على حفلة متأخره وانا ما حبيت اطلع بالصغار لإنه الدنيا برررررد.

عموره نام بدري،،

وبيسان غفت دوووووبك خمس دقايق وصحيت بدها حليب

ولسوء حظي يومها كنت متحوجه أغراض البيت وناسيه موضوع " حليب الخانوم"

وعينكم ما تشوف إلا النور

لمدة ساعة متواصله بكاء,, عيااااط و دموع،، وإترمي ع الأرض

وفعفطه ،، إشي بيقطع القلب من جواه.....

إشتراك تلفوني كان خالص

حتى" الرجاء الإتصال بي" كنت مستخدماها

وبقدرش أنزل ع الحاره أشتري من الدكانه 

من جهه,, عمر نايم,, وإزا صحي وما لقاني ممكن يلتمس وهات قطبها

وبقدرش اطلع  وأخد بيسان عشان الجو باااااااااارد وخايفة تلتفح

ومافي ولا بني أدم بتنفس في العمااااااااااااره كلها

والوقت متأخر وبحبش الحاره بهيك وقت،،

ماااااااااااااااا عرفت شو بدي أعمل,, 

حاولت معها بأكتر من شغله، ، بس ما رضيت تشرب أيييييييي إشي بديل,, لا يانسون ولا شاي ولا عصير ولا بطيخ إمبسمر كمان

 ولا حتى تاكل ولا إشي :(((

بس بدها حليب :((((

شو عملت أنا,,حسيت إيدي إمربطين 

وقلبي رح يطلع من مكانه من وجعي عليها

 قعدت بجنبها  ع الأرض وصرت أبكي زي الصغار

تمنيت الأرض تنشق وتبلعني من كتر ما إنضغطت 

فش بإيدي إشي أعمله

موقفي اللي فوق بجوز تافهه وصغير لمعظم الناس اللي لسه ما جربت شعور

 " الأبوه أو الأمومه"

بس أنا شفته أخر الدنيا,,

 اكبر مشكله,, 

معضله ملهاش حل..

إنه بنتي تطلب إشي وما أقدر اجيبه ( منيح ما طلبت بيتزا وريش لووول)

والحمدلله الوضع المادي والإجتماعي عندي كتيييييييير كويس 

إشحال الأب اللي عنده خمس أطفال ومعوش يدفع لا أجار بيت ولا مصاريف مدرسه ولا حق كيس خبز؟؟ ولا كعكه ولا شوكلاته ولافواكه ,, ..ولا ولا ولا .....

شو بتتوقعو تكون نفسيته؟؟ 

لووز؟؟ عادي؟؟ 

لا والله,, 

بتكون الدنيا سودا بعينه,, وحاسس قرود الدينا بتنط نط قدامه

وحتى ممكن عقله يصير يوديه ويجيبه للحرام إنه يسرق وينهب عشان يخلص أطفاله من بكاهم وعياطهم وطلباتهم الأساسيه،، مش سهل الموضوع من مرررررررررره

إزا ربنا كان عارف ومتوقع إنه رح يجي يوم ع البشر ويعملو ف حالهم وفي أولادهم هيك ونزل في كتابه الحكيم (سورة الأنعام )

 {وَلاَ تَقْتُلُواْ أَوْلاَدَكُم مِّنْ إمْلاَقٍ نَّحْنُ نَرْزُقُكُمْ وَإِيَّاهُمْ }

بدنا إنكون إحنا أفهم منه " عز وجل" ونصير نفتي فيها ونحكم ع الرجال ونطعن ف رجولته وأخلاقه وتربايته؟؟؟

أنا مش مع هيك تصرفات,,ولا ممكن أوافق عليهامن أصله

 أنا فقط ضد الأحكام العرفيه اللي بيطلقوها الناس على الشخص اللي ربنا إبتلاه بهيك وضع وهيك حالة..

الله يفرجها علينا وعليهم وعليكم يارب