ذكرى هبله

كنا عم نلعب أنا وياها على طرف الشارع

بنكوم التراب 

بنبني قصر

إبنهدمه

بنكتب على التراب أشياء مدايقتنا بدنيتنا الصغيره
منشطبه وإحنا منتدحرج وبنشدشد بعض 

تطاوشنا على مين بده ياخد المعلقه البلاستيك عشان يشتغل فيها

علبة السمنه الفاضيه أخدتها أنا،، وصارت هيه تبكي
باكيتات الدخان كانت مصاري عشان نشتري من بعض
ال " ريم" بتساوي دينار بحاله 
بادلتها فيه بورقتين" دخان أجنبي"  عشان يكون معي فراضه
إشتريت من دكانتها قزازه "كولا" فاضيه و فردة شحطاه بلاستيك


بنرسم خط بالحجاره
بنعمل بيت بيوت
حدود بيتي طلعت اكبر من حدود بيتها
رفشت بإجري الحجاره اللي بتشكل هالحدود عشان ما أزعلها
زبّطت مدخل بيتي ،،دوكرته  من حجر صغير أسود 
أجت أخدته
هربت  وتخبت تحت الشجره


صرخت فيها 
إنه إرجعي مسامحك أصلاتن مبحبوش
طلعت من مخبئها
حاملة الحجر بين إيدها كإنه حبه شوكلاته 
ورجعتلي إياه وهيه عم تبتسم

من بعيد سمعت صوت زامور عالي

هيّـه ما سمعته
أو هيك تهيألي

خفت أنا

كبيره هالسياره وشكلها مش شايفانا

ركضت لعندها 

ومسكتها من إيديها 

سحبتها ع الأرض 

شديتها
كانت بتصرخ فيني
 مش فاهمه إيش بعمل

ضليتني أشدها,, وأشدها

وهيه تصرخ إنه تركيني 

عليّ صوت الزامور

خفت أكتر

متطلعتش على السياره

ضليتني" أشحوط " فيها 

كإني لمحت دم عم ينزل من إجرها 

ما همني,, 

اللي في بالي أني أخدها وأتخبى في الحوش

ما أبعده هالحوش

متزكريته أقرب،، 

صار الزامور ,, كإنه طالع من جيبتي

وشديتها أكتر,, وخفت أكتر وأكتر

صرت أبكي

حسيت حالي رح أندعس أنا وياها

تكبلت بأرضي
حضنتها ،، شديت إيدي حولين راسها
غمضت عيوني
وعليّ صوت بـُـكانا
انا ببكي من الخوف،، 
وهيه بتبكي من الوجع والجروح

.
.
.

مصحيتش غير على إيد عمي

خبطني على رقبتي

سمعت صوت 

طرااااااااااااخ

 حكالي

ولك تركيها " يا هبله"  شايفك مش رح أدعسك أنا
:(((