محاكمه عائلية من نوع خاص

صباح الخير,, عليكم كلكم يارب

عذراً لإنقطاعي عن المدونات بالفترة الماضيه,,
أكتر سبب كان مبعدني.. الشغل والعجقه
ومن ثم النفسيّه,, و وفاة والدة اختي العزيزه فرتش,, كثير اثرت فيني
كل هاد اللي صار معي,, وإشياء بتنحكاش كمان خلتني حااااااااانقه وحاقده ع اهلي لدرجه ملهاش حدود

بدي ادورلي ع محامي او محامية بارعة,, واقعدلي معاه قعدتين ثلاث,, ت أفهم
"قانون العقوبات الأُسـرية" والقصص كلها اللي متعلقه فيه
واجيب ( إمي وإبوي) الله يخليلي إياهم و (خالي محمد ) لإنهم اكتر ناس إتدخلو ف تربايتي السنوات اللي فاتت
وأحطهم ف قفص الإتهام,, طبعن رح يكون قفص سوبر ديلوكس,, ومكندش وكراسي جلد وشاشه
(HD)
حيكون بالإسم " حَبـــــس "

ورح احاسبهم ع اللي عملوه فيني :@

اه مجنونه انا .....

ليش يربوني ع الصدق والأمانه في التعامل,, ولمى أكبر الاقي حالي الوحييييييييييده اللي بتعرفش تكذب؟؟

ليش يحكولي,, ازا حدن وقع ف مشكله,, لو كنتي ف أخـــــر الدنيا إتركي كل شي بإيدك ,, و رُوحي ل عنده وساعديه ع قد مابتقدري,, لو ع حساب حالك وصحتك ونفسيتك,,
ولمى أجي و أوقع أنا ما الأقي من اللي كنت اطاردلهم حدن يحكيلي " وينك" أو " مالك" ؟؟

ليش يحكولي,, لو بتوصل فيكي إنك تقطعي من شراينك وتصبي بكاسه ت تشربي الناس عشان تخدميهم
وبس اعمل هيك ويخلص دمي ,, الناس تزعل وتقلب عليّ لإنه : " ماكفى الإنتاج" أو "كان دون المتوقع " ؟؟

ليش يحكولي,, ضلي أُشكري الناس وعامليهم كويس حتى لو عاملوكي بمعامله سيئه,,
وبس اكبر ما ألاقي حدن يعاملني بنتفه من هالحكي وكإني عم بتعامل بعدايئه مع الناس مش العكس

ليش يفهموني ,, إنه المصاري "وسخ أجرين" لا تهتمي فيها,, ولا تتعبي وراها ,,ولا تعـِـزيها أكثر من حالك
وألاقي العالم بتتعامل معي ع اساس " معك قرش,, بتسوى قرش" و " إللي معوش مبلزموش" ؟؟

ليش أطلع أنا الوحيده اللي ما بتخون,, وحتى إزا فكرت إشي من حركاتي كانت فيها رشة خيانه,, بروح زي البسه وبعترف للشخص المغدور
والناس اللي حوليّ مقظينها خيانه وطرق اسافين وطعن بظهري ت صار شكل ظهري" شوارع دم" من كتر الأذى؟؟

ليش يحكولي كوني طيّبه و ع نياتك ولا تتخابثي وتتحاقري على الناس وخلي كل إشي بتعمليه " عشان ربنا" وكوني حقّانيه بكل شي
ولمى عملت كلللللللللللل هالحكي وأكتر كمااااااااااان,, طَـــلّعو الناس عليّ سمعه إني قويه وكاسره وشريره وبنخاف مني وبنحسبلي الف حساب لإني خبيثه ومن تحت ل تحت؟؟

ليش ,, بحكولي ,, ربي أولادك زي ما ربيناكي,, وبس أزت أبني بين الأطفال يرجع متعلم الكذب من فلان,, لإنــه إم فلان بيطييييييير عقلها بس إبنها يكذب,, ومتعلم الضرب من فلانه,, لإنـــه إم فلانة طايييييير عقلها إنه بنتها صايره بتضرب وبتأذي اللي أكبر منها؟؟

ليش يحكولي,, لو حدن طلب منك خبزه وماعندك غيرها بالبيت ,, أعطيه إياها و أعطيه حق ربطة خبز كمان,, وصدقوووووني إني بعمل هيك من كل نِفس والله عليّ شاهد
وبوقت ما أحتاج كاسه بلاستك من النوع اللي بتنكب بالزباله بس الواحد يخلص منها ,,كأبسط وأسخف مثال,, العالم بتقطع إيدها وبتشحد عليها,, وأنا عاااااااااارفه شو عند هالعالم!!

ليش تكون أكببببببببببر قاعده عندهم " إلتمس لأخيك مليون عذر" وخلوها تترسخ فيني للصميم
وبس أكون أنا اللي عليّ الحق,,وحتى لو الموقف كان " سوء فهم" مش أكتر,, بطلعش ف صالحي او معي نص عذر ؟؟؟

ليش,, اه ليش,, وهاااااااااااد كله,, بعدني ما حكيت شي من اللي ذابحني ذبح .....

بعدني عم بحس حالي جايه من كوكب أخر ونازله بالكبسوله ع عالم ملهمش دعوه في اللي ربوني عليه
حكولي,, العالم منيحه,, بس إنتي بتتطلعي عليهم من منظور غلط

ل هلأ,, بس لا سمح الله انضغط من اللي بيصير فيني وأروح واشكيلهم (ونااااااااااااااادراً ما أشكي ل حدن أنا )
بحكولي اكيد بتمزحي,, او اكيد ما فهمتي الي صار معك كويس,, فكري منيح

شو أعمل ف حالي,, اروح ع اخر الدنيا وأعيد تربايتي من الصفر؟؟ وإبلش من الروضه
( الف باء الخيانه والحقاره) عشان اقدر اعيش بهالغابه اللي حوّلـــي؟؟

...
.
..

والله إني تعبت وحقي إني ارتاح شوي