أقدم ذكرى

هاد تاج إختياري,,من الست ويسبره وانا رضيت فيه
واخد بالك حضرتك ;)

طفولتي أبدن ماكانت طبيعيه ل " بنت" كانت كلها حوادث ومصايب ومستشفيات وغـُـرز وتقطيب
ليييييييييييييييش يا حزركو
أبدن,, أبدن,, مش إني حـِــركة كتير كنت,, ولا إني فـِــسفس للصغار وبضل أهويلهم نطلع رحلات على أماكن منعرفهاش
o_0

في حادثتين مابنساهم,, اول وحده

كنا رايحين زياره ع بيت جدي بمنطقة السابع,, بأيامها ما كان في بنايات وإسكانات ومولات زي هلأ
يعني كان بإمكانك تشوف المدينه الطبيه وإنت و واقف ع إشارات مجمع جبر
المهم,, كان نهار جمعه,, و وصلنا بدري
والكل مشخص,, لابس بجامات رياضه وبوطات,, كإنه محضرين حالنا لمشوار سوبر كووول

جّمعت الأولاد,, من مختلف الأجناس والأعمار ( اكبر حدن كان إبن عمي صف ثالث,,واصغر حدن كانت اختي عبير شي 3 سنوات),,
وعملنا عصابه " أبو العبد" وأخدو مصاريفهم من أهاليهم,,وأعطوني إياهم عشان اشتري المونه والأسلحه,,
رحت انا إشتريت شبوسات وعصيرات وشوكلاطات, , ومسكتهم لإمين سر الحركه" أخوي محمد" وحكتله ممنوع توزع منهن قبل ما نوصل مبتغانا...

شدينا الرِحَال,,وإنطلقنا من عند إشارات الكيلو ( الله يسهل عليها) بإتجاه أراضي المدينة الطبيه اللي هيه هلأ حدائق الحسين
وعملنا زيّ أسراب الحمام,, ماشين بشكل رقم 7 بالعربي,,
وبلاد تشيلنا وبلاد تحطنا,,بعد شوي,, بلشت الجماهير تتراجع وتتقهقر,, وصار في إنفساخ في التشكيله الأساسيه للفريق,, " محمد" اخد الأغراض وإنسحب بدون ما إنحس فيه ( بس اشوفه باخد حقي منه,, هلأ تزكرتها هاي)
والأصغر عُــمراً من حضرة جنابي,, بلشو يبكو وينوحو كمان,, لإنه إختفت البيوت من حولينا
طبعاً انا ولا ع بالي,, ضليت مكمله الطريق,, لحد ما وصلنا الإشاره,,وقطعناها
و عند باب المدينه,, تفكفكت صفوفنا,, وصاروبدهم يروّحو وهات عاد أتزكر كيف ممكن أروح,,
وبلشنا حلقات بكاء متقطعه,,
على سمفونية,, وينك يا ماما,, تعا يابا روحنا
بالصدفه عمّــي كان مارق بالدبل كابين بتاعه,, وأول ماشافنا ,, اجا وشدرنا معاه,,
وبعديييييييييييييييييييييين..........( اكيد مش حلوه احكيلكم شو صار اول ما وصلنا )
وبعدين,, اللي متزكراه,, إني تعاقبت إسبوع بحاله وإنمنعت من التلفزيون,, وغيبوني يوم عن المدرسه( هاد كان اسوء أنواع العقاب من الست الوالدة) بسبب الكُره والحقد الطبقي من نسوان أعمامي عليّ لإني مخربه وإرهابيه وسوسه.

الموقف التاني...
كنت كتير اوقع وأندب وانجرح,,وكان طبيب العائله إسمه " زهدي قمر" الله يسهل عليه
وأبدن,, لازمن كل شهر او أسبوع ازوره
مره راسي مفتوحه ,, مدبوبه عن السور
مره,, اخوي ضاربني بمفتاح أنجليزي فاتحلي جبيني
مره,, ناطه عن السور,, ع " فاس التراب" وداخل بإجري وطالع من الجهه التانيه
ومره,, متزحلقه ع المغسله و مكسره سناني,, وذقني مفتوح سبع شبار
ومره مشتركه بعراك طفولي بريء بين ولاد عمارتنا وأولاد عماره قبالنا,, كان العراك تبادل حجاره عن الأساطيح ادى إلى فشخي بقذيفه لولبيه ,,
ومره,,ومره,,ومره
المهم,,
في فتره,, إمي سيطرت عليّ,, ومنتعتي من اكشناتي,, ف بطلت انط نط,,ولا اتشعبط ع الأساطيح او السوار
وبالتالي,, بطلت اندب ,, و اتغرز,, واروح مشافي
بهديك الفتره,, الدكتور بيتصل ع بيت جيرانا وبحكيلهم عظم الله أجركم
اكيد تأثرتو بمصابكم,, والبنت عشنها كانت شيطانه,, ماتت هيك
قصده عني,,
وأتاريه سامع إنه طفلة بمنطقنتا متوفيه وفكرها أنا,, لإني مازرته ولا مريت على عيادته من فتره

وإنتو شو صار معاكو,, هاد تاج مفتوح (يا عيني على الديمقراطيه)

كلكو ماعدا الشياشاني لإنه إعتذر من اولها :(
"