النسوان,, بين هلأ وزمان

صباح الخير عليكم كلكم يارب

ليش النسوانات بيتعبن هالأيام,, كتير بسمع هالتعليق من " الرعيل الأول" أه ليش؟؟

بالزمانات الله يرحمها ستي,, كانت تصحى من قبل صلاه الفجر,, تعّلق المي السخنة على البابور عشان الغسيل وبتكون مخمره العجينات من أخر الليل قبل ماتنام,, بتصلي الفجر,, وبتحط" الفوج" دفعة الأواعي الأبيض على الغلي
وتبلش غسيل,,
طبعاً الغسيل كله " مـــَعــِــك" يدوي,, بصابونه غار او جمل,,
وبعدين " بتبـِحــوه" بتشطفه ب " نيلة الغسيل" عشان يطلع أبيض مزهز
كل قطعه كانت تمر ع إيدها وتضل تشتغل عليها عبيل ما تلعن افطاسها وتصير بتضوي ونضيفه
بتخلص الغسيل وبتبلش خبيز
ع السريع,, بتحضرلها أكم منقوشه زعتر,, على صفيحه بيض وخبز أسمر ب حبة البركه والسمسم عشان الفطور
بتنزل ع الحاكوره,, بتلقط نعنع للشاي,, وبتبلش تعزيل البيت,, بالمكنسه القش وبتنفض " الحصيره" وبترشرش مي قدام الدار عشان الغبره..

بتصحي خوالي عشان يفطرو قبل ما يطلعو ع مدارسهم
بتفطر معاهم السريع,, بتحضر " بقجه" فيها زواده وفطور ل توديها ل سيدي ( الله يرحمه) لإنه بكون مستهل ع شغله بالأرض من بدري
بس ترجع ,, بتنزل ع الحاكوره مره تانيه,, بتجيب جاجه,, بتذبحها وبتنضفها وبتعلقها ع الغاز عشان تحضر الغدا
بترجع بتكنس البيت,, وبتنفض الغبره, ,وبتطوي الفراش على المفرش.. زي المسطره
بيضل عندها جلي الجليات,, وتلميع الألمونيوم,,
بتنزل ع السوق,,ودايمن السوق بعيد,, بتشتري خضره,,وبتحطها ب " ســـلة" على راسها,, وبترجع على البيت ت تخلص طبيخ
بعدها بتاخد طبيخها وبتنزل ع البيدر,, او الحقله عشان تتغدا هيه وسيدي (الله يرحمه ) في أرضهم بين شجرات الزيتون وخصوصن تحت الدالية.
وبتبلش شغل معاه,, إيدها على إيده,, على تقليب الأرض,, وتقصيف الشجر بموعده,, وتلقيط العنب والتين عشان تبيعه بالسوق بعد الضهر على على .......


هاد نفحه من يومها.

إحنا بنكسر ضهرنا " الأيام هاي" مع إنه عنا غساله توماتيك( بتغسل وبتنشف وبتبح)
والغسيل عنا بس " نشير " ع الحبال
والأرض كلها مفروشه موكيت وفوقه سجاد لابنشطف ولا ع بالنا وفي فاكيوم لتنضيفها ,
وفي جلايه صحون,, احياناً
وفي تلاجه فيها خضره بنضطرش ننزل ع السوق كل يوم
وفي مايكرويف لتسخين الأكل وتذويب التلج عن الجاج المفرز بسرعه
وفي طنجره ضغط ,, بخلال نص ساعه بتخلي اللحمه مستويه ععععععععععع الأخر
وفي هووم مييكر ,, بتعجن وبتقطع وبتهرس,, وإنتي بتحكي تلفون
وفي كوسا وباتنجان محفوره وجاهزه بس ضايل تحشيها
وفي دوالي ملفوله ومطبوخه بس ضايل تاكلها
وفي مفتول جاهز للتهبيل,, لا إفتلي وإلا يــنحم بالك
وفي,, وفي,, وفي,,,,,,,

عارفه رح أنطرق من " نسوانات" المدونات,, بس هاد اللي طلع معي ;)

طب ليش برايكم,,إحنا بنتعب ؟؟

أنا بحكي,, أكلهم كان أحسن,, ف بالتالي صحتهم أحسن وبتحملو تعب أكتر منا إحنا
بشربو زيت زيتون كتير,, بياكلو دبس رمان أو تمر كإنهم بيشربو سنكافيه بأيامنا هاي
مافي كيماويات بأكلهم,, كله طبيعي
الصحوه بكير,, إلها دور كبير كمان,, خاصه الشغل بعد صلاه الفجر على طول
والنومه بعد صلاه العشا دايركت برضو إلها دور

.
.

بدي ونــِــفسي,, أرجع على البلاد عشان أعجن وأخبز ع الطابون,,
وأكل صفيحه لحمه طازه وأنزل على الحَــقــلة
وأطعمي ولادي وإحنا مفترشين التراب
:(