لنكتب عن.... ظاهرة المعاكسات \ شهر حزيران

أنا مش مع الجروب،، لكن حابب اشارك بتجربتي الشخصيه

أول مره إتعرضت ل "معاكسه " كنت صف ثامن كإنه،،

الري أكشن كان كتير مش حلو

بما إني " شيخ شباب" ف حسيتها إشي بجرح وبيحزن وروحت أبكي ل أبوي

أبوي " الله يحفظلي إياه" إستغرب إني بشكي من هيك

إشي " إسمي الحركي كان أبو العبد " وحكالي : هلأ بلشت حياتك تتغير :(

بالإعداديه والثانويه كانت الحياه  غريبه ومش حلوه بالنسبه لهاي الظاهره بالذات..

إكمنها مدرستي كانت ضمن مخيم لاجئين

يعني منطقه جدن صغيره وشوارع ظييييييييييقه،،

وقت الترويحه بتصفي تتدفيش و مداحشه ما أنزل الله بها من سلطان

حللولنا إياها "جماعة اللجنه الدينيه و المديره" وطلبو من الشرطه تتجول في شوارعنا بوقت الترويحه لإنه المدارس الذكور وإناث بيروحو وببلش دوامهم بنفس الوقت.

لمى كبرت شوي،، وصار فيها كليه و جامعه وباصات ومجمعات وتأخير وزيارات بدون مرافق  صرت أحط " موس كبّاس" بشنطتي

أبوي مسكني مره وسحبه مني،، بس فعلن كنت حاسيته أمان بالنسبه إلي

لإنه بالفتره ٢٠٠١-٢٠٠٣ كتير صارت مشاكل وإختطافات وتحرشات أدمت لها العين 

مغامـــرة:

بأول أيام الشغل وأنا مروحه ع البيت لحقني شب 

الدنيا كانت مسا ومعتمه والضواوي مكسرين بشارعنا

 ولا نفر بالحاره،، كإنه كان وقت صلاه العشا

وعـ إيش يا حلو،، و وين رايح،، وتعا نتمشى سوا

أنا ضليت ساكته ومختصره وشديت بخطوتي

راح الأخ،، شد بخطواته

إييييييييييييه،،

شو أعمل طيب،،

فش تلفون مع حدن ف البيت إلي أرنلهم؟؟

والشب ما إختصر،،

كمل حكي،،

وكمل مشي

أنا قبعت معي،، عصبت رسمي ،، خلص مش قادره أتحمل

شو عملت ؟؟!!؟؟

صرت أمشي شوي شوي

وهوه ماشي بسرعه ت وصل ل عندي

لفيت وجهي عليه وأنا الشياطين بتتنطنط قدامي

ورفعععععععععععععت إيدي

وتناولته بالكف،،

وخبطته بالشنطه ع راسه " كانت ثقيله "

ولمحاسن الصدف،، لمحونا أولاد الجيران وأجو كملو المهمه

بجوز غلطت اللي ضربته،، وبجوز كان رح بيضربني" برغم إني لياقتي كويسه وممكن أتحمل هوشه ومضاربه " بس الوقت والعصبيه والخوف بخلو الواحد يطلع عن طوره وتربايته  يتصرف بطريقه ما بحبها.....

لاحقـــــــــن،،حاولت أدور ع شي يحميني من هيك " ظواهر" لإنه مش شرط تكوني " الأميره ديانا" بجمالك ت " تتعاكسي" الشرط الوحيد إنك تكوني " أُنثـــى" حتى تتلطشي وتسمعي حكي وحدن يلحقك أو يتهور ويمد إيده

أخر حل طلع معي إني أشتري " الصاعق" لإني لفتره منيحه كنت أستخدم المواصلات العامه،، ودائماً ترويحتي بتكون متأخره 

ولوحدي بدون حدن

حتى وأنا متزوجه،،

وحتى وأنا وراي أولاد وأولادي بحضني،، 

بس أطلع بالتاكسي بتكون إيدي ع الشنطه ،،

وسحابها مفتوح،،

و الأمان بتاع الصاعق مشيول،،

يعني ستاند باي لأي أكشن،،

مش حلو هيك صح؟؟ 

:((

شغلي هلأ بمنطقه صناعيه،، يعني موقع شركتي جاي بين كراجات و قزاز سيارات ومحلات هيك تخصصها

ف بتصفى كل نزله ع الشارع ت أشتري شي،، أو أروّح،، او أستنى حدن مغامره وسمعان حكي ملش أول من أخر

ملاحظــة: أنا بكره الناس اللي بتحط الحق ع البنات ولبسهن،، لإنه متل ما حكت ويســـبره حتى المنقبات ما بسلمو من هيك قصص " إمي وإختي " وعندهم قصص بتخوف 

كل رسامين الكاريكترات حاطين صور معاكسه والبنت لابسه " من غير هدوم" يعني الذنب مش ذنب الشباب،؟؟؟

أبدن؟؟؟ 

طب ولا بشلم؟؟؟