وبالوالدين إحسانا :)

الله عليكي يا ليو,, فتحتيلنا جروحاتنا ب بوستك بالمدونه الإسلاميه
صارلي فتره منيحه ناويه اكتب عن والدي,, بما إنه اول قدوه بحياتي ,, وغلاته بقلبي غريبه لإنها انانيه بجد
مرت فتره وأنا وصغيره كنت اغار من إمي ع ابوي,,
غيره جنونيه,,
بحبه ,, بعشقه,,
لدرجه إني لحد هلأ بس اروح عندهم بقعد تحت إجريه...

والدي تعذب كتير بحياته
وبعده بيتعذب,,, الحمدلله
إنولد بفلسطين من هون,, وقامت الحرب بال48 من هون
اجو اهله ع الأردن,, ولخلاف بسيط إنفصلو والديه
الأب والأم تزوجو,, وكل واحد راح ل بيته
والدي اخده عمه ( اخو ابوه ) يربيه
تنقل بين اكتر من بيت,, ورجع للعيشه مع ابوه
صارت معاه قصص بتنحكاش
بجد, , مابعرف كيف ل هلأ عايش وقادر يبتسم بوجوهنا
سافر ع المانيا ت يشتغل,, وبعد 20 سنه التمو عليه شله إسلاميه وحكوله شغلك هون حرام
ف رجع ع الاردن,, وإشتغل بالفنادق الكبيره ك شيف,, اخرها كان الشيرتون
التمو عليه كمان شله,,وحكوله شغلك كمان هون حرام
ترك الشغل في المطاعم وبلش حياته مره تانيه من الصفر

أهم شي بحياته إنه ملتزم,, وبعمرها ماراحت عليه صلاة الفجر بالمسجد
حتى لمى كان مريض,, وحتى لمى بفّلوز
بيجي ع حاله,, وبجر حاله للمسجد

كتير بسامح الناس,, وعادي عنده إنه حدن يسيئله اول النهار وأخر النهار يدينه مصاري ولا كإنه صار معاه شي
مابعرف يحقد,, ولا حتى يغضب من حدن,, او يقاطع ويبعد زي البشر


مابدي احكي شو كمان صار معاه,, عشان ما تتحجم الأمور والعالم تشوفها صغيره
الله يكون في عونه,, و يوقفله ولاد الحلال اللي يحسو فيه بأخر عمره
ويعطيه الصحه والعافيه ترى فوق إنه مريض ب مفاصل رجليه
و لهلأ بطلع ع الشغل من الفجر لصلاة العشا
طلع معاه سكري وضغط وتعب في عضله القلب
يا إلهي,, لمى سمعت الخبر حسيت الأرض بتموج حوليّ


بحرقلي قلبي بس يحكيللي" ادعي الله يختارلي الأفضل ويريحني,, لإني تعبت"
بلجملي لساني,, ومابحس ع حالي كيف بخلص نهاري

حبيبي ياباه,, بجد انا بحبك
الله يشفيلي إيايك,, ومايحرمني منك ومن طلتك ومن حنيتك
اللي مافي منها بالكون
وتضلك تاااااج راسي,, وسندي