برنامج حواري,, تتمه

وبعد إن إتقفنا على أن لا نتفق,, في بوست الأنسه كيكي قرقرت انا وأطياف الصبايا المدونات , إني اعمل برنامج حواري ساخن,, عن اول قضيه في البلد

التقديم,, إم عمر,, ويسبر ,, كيكي العقل المدبر,, نيسان النايمه,,

المنظر العام,, ستوديو مفتوح فيه كنبايات على شكل حبة بوظه لونهم اخضر
طاوله وسطيه مصنوعه من الزجاج والكهرمان المعتق ( تخنتها,, بعرف,, بس عشان نشهر البرنامج)
والأرضيه سجاد أخضر,, في أكم نفر جالسين ع الكراسي لزوم التصفيق والتصفير
وكاميرتين أجار من عند ستوديو الهرم- وسط البلد ,,وحده فيهن بتسجلش صوت

بعد موسيقى رايقه للموسيقار ياني بتخلص الشاره وببلش االحورا دايركت :)

-ويسبر: سباااااااح الخير , مشاهدينا الأكارم,, اليوم الحلقه الأولى من السلسلة الالفية لحلقات
( مدونات زهريه إلى ألابد)
(Pink Bloggers for ever )

-كيكي: برنامجنا هادف,, مشعبر,, كله قصص طرمه ملهاش دعوه أو صلة بالواقع,, وملناش هدف لحل اي مشكله

-نيسان: ( بإستغراب) متى بلشتو,, ( وتعود لقيلولتها).

-إم عمر:رح بتلاقو عنا كل انواع الحكي اللي مش مفهوم,,وإلي ما إله تصنيف او سبب واضح,,وإحتمال يجيكو صداع ف إحتياطان خدو حبتين باندول إكسترا أحمر

( ستووووووووووووووب) صوت أصم أذان المقدمات( وك إم عمر بتعملي دعايه لدوا البندول,, استغفر الله بس,, يالله بنقصها بالمونتاج)( بصوت حنون هالمره : كملو سبايا)

-الجمهور
: تصفيق وتشويح بالأيدي مع حركات إنه Wow,, كمان ,, كمان
( المنتج دافعلهم خمس نيرات على الراس)

-إم عمر: بورنامجنا برعايه ذهب فرفشه,, اغلى منه مافيش,, شايفين ( تشير إلى ميداليه ذهب بمفاتيح سيارتها العوايه)

صوت بالمايك داخل ذنين المقدمات من غرفة الإخراج ( ستوووووووووووووب) منعون اطلسك إم عمر,, حكنالك ماتورجي المداليه ل حدن احنا بنجيب الكاميرا عليها بحركه تلقائيه هيك فقستي الدعايه ( بصوت أهدى) انسه ويسبر,, بليز قدمي الدعايه إنتي,, يا جماعه من اول وجديد فقرة الرعاية..

-المايك مع ويسبر : بنشكر ذهب فرفشه على الرعايه الرسميه ,, اليوم وكل يوم

(المخرج بينه وبين حاله,, يااااا سلام,, هيك التقديم,, اخر مره إم عمر بتشارك معانا المره الجاي بنحطها مع الجماهير )


-كيكي: اول حلقه رح نحكي عن حق المراءه في الترشيح للمجلس النيابي,, إسم الله في اكتر من مرشحه بنتمنالهن النجاح

-ويسبر : بالدورات الماضيه ترشحو أكتر من " نسوانه" للمجلس وهاي الدوره بنتمنى تكون الحركه النسوانيه طاغيه بالأكتر

-كيكي: بركي على الله حدن قدر يرجع حقوق النسوان ,, وقدر يوصل مطالبنا وينفذها بالشكل المناسب والعملي ,,وماتكون الإنتخابات مجرد بيان من نوع ( بله وإشرب ميته)

-ويسبر : والله يا كيكي شايفالك الرجال صار بدهم مجلس للمطالبه بحقوقهم اللي ضيعوها وهمه بناضلو معنا

-إم عمر : لوووووووووول,, إيه صدقتن ,, صدقتن ( المخرج,, سنحك إم عمر ع هيك ضحكه,, كله ع المونتاج عمّي)

-كيكي: قصدك يا ويسبر إنه إحنا من كتر ما اخدنا حقوقنا ظلمنا الرجاجيل معانا؟؟

-ويسبر: أنا هيك شايفه,, تخيلي معظم الموظفين بالوزراه عنا نسوان,, ونسبه الرجال عنا تقريباً 25.5% بس ؟!؟

-إم عمر( ملتخمه) : كيف يعني نسبه الرجال فيها كسور عشريه !!!

-ويسبر: حبيبتي إم عمر النسب لا ترمز للأشخاص,, إحنا بنحكي عن اعداد ومقارنه مش أكتر.

-إم عمر: ااااااه,, فهمت,, كملن ,, كملن

-ويسبر: ف مشان هيك عم بحكي إنه شكله الرجال إعتزلو الشغل المكتبي وإتجهو للشغل الحر,, مكانيك و طوبار وشوفيريه

-كيكي: بجوز اخدو المناصب العليا بالبلد وتركولنا الدوائر الصغيره نتسلى فيها,, ليش ما يكون هيك تفسير قله الرجال في المكاتب عندكم؟؟

-نيسان: جبتو الفطور,,, في شاي ,, مين سمير ؟؟

-إم عمر: وحابين نعرب من مكاننا هذا إننن....( الصوت للمخرج,, إم عمر شو رأيك تريحيلنا أحبالك الصوتيه شوي ؟؟)

وهووووووووووووووووووووون بنتط إم عمر,,
وبتقلب الطاوله اللي بالنص ,, وبتحكي إشمعزا انا اللي مش مسموحلي اشعبر عن مشاعيري بحريه وبدون ما يتمنج كلامي

انا بطلت العب معكم,, بطلت بدي أقدم اي شي,, بدي ابعت ل اوبرا تشغلني معاها بأخر حلقاتها بلكي كملت مسيرتها
وهاااااه,,
وبتحمل معاها الكرسي لإنه عجبها وشكله بلبق للبرنده,, وبتروووح,,
ومن ثم ينقطع البث لإسباب فنيه بحته *_*
( سمايل طوش ومغافر وغرامات دفعتهن إم عمر زي الاسد السعيد)


بي إس,, اي تشابه بالأسماء واللنكات هوه محض صدفه ولا يمت للواقع بصله ولا ب بندوره كماناه